O CES esixe solucións ao verquido de augas fecais ao río da Chanca

O Colectivo Ecoloxista do Salnés (CES) denunciou este mércores o impacto que sofren os ríos do Salnés, neste caso o da Chanca, no lugar de Abuín, en Meaño, onde se está a producir un verquido de augas fecais. Dende o colectivo explican que estes verquidos prodúcense recorrentemente dende, polo menos, novembro de 2023 ata a actualidade.

Uns fluídos que saen por desbordamento da propia rede de saneamento das augas residuais e pluviais que van cara á depuradora situada no lugar dos Pasales. Nese punto, a tubaxe fai un pequeno desnivel no que os limos quedan depositados na arqueta que alí hai. A auga busca sitio través dun aliviadeiro ou pola propia arqueta, vertendo directamente ao río.

A zona sofre "olores pestilentes e limos" que enturban as augas, engaden dende o CES. "Semella que ten fácil solución, xa que só se necesita unha mellora no mantemento da arqueta coa limpeza periódica de limos depositados". Ante isto, o Colectivo Ecoloxista do Salnés enviou escritos tanto a Augas de Galicia como ao Concello de Meaño para comunicarlle dito impacto, pedirlles información das causas e solicitarlles que tomen cartas no asunto na busca dunha solución duradeira.

Ademais da contaminación que este verquido está a producir no río da Chanca, tamén afecta ao estuario do Bao onde o río desemboca. Trátase dun humedal nun espazo natural protexido a nivel pertencente á Rede Natura 2000 e con varias figuras de protección autonómicas e internacionais.

Para o CES estos episodios contaminantes, "que non se producen por accidentes casuais e puntuais, senon por unha falta de mantemento das infraestructuras públicas, pode e debe ser solucionado o antes posible". O Colectivo non entende "a que agardan a Xunta e o Concello para actuar", sentencian.