Sete entidades da comarca do Salnés recibirán preto de 16.000 euros no marco das axudas convocadas pola Deputación de Pontevedra para a realización de actividades turísticas durante o ano 2023. As axudas, que foron aprobadas na última Xunta de Goberno da institución provincial, teñen por obxectivo colaborar na promoción do destino Rías Baixas e estimular a competitividade, a calidade, a accesibilidade e a sostibilidade do sector turístico.
No caso concreto do Salnés, beneficiáronse entidades de Cambados, O Grove, A Illa de Arousa, Sanxenxo e Vilagarcía de Arousa. Grazas a estas axudas, a Ruta do Viño Rías Baixas recibe financiamento para a súa asistencia á feira Intur de Valladolid, a Asociación de Empresarios Grovenses para un plan global de desestacionalización do turismo da vila, o Club Montañeiros Celtas para a actividade ‘Os cinco sentidos no Grove’, a Asociación Cultural Dorna para o patrimonio marítimo galego, o Círculo Cultural Deportivo de Sanxenxo para o XV Torneo Internacional Cadete Sanxenxo, o Club de Piragüismo de Portonovo para a V Festa da Empanada Mariñeira e Amarcarril para obradoiros e rutas guiadas de marisqueo.
Este ano a institución provincial aprobou destinar axudas a 40 entidades do conxunto da provincia por valor de 100.000 euros, no marco dun novo impulso do goberno provincial para fortalecer o sector turístico da provincia.