A Deputación acaba de aprobar en Xunta de Goberno destinar preto de 500.000 euros para que tres concellos de O Salnés impulsen novos investimentos, afronten gasto corrente e contraten a 8 persoas ao abeiro das tres primeiras liñas do Plan +Provincia. En concreto, benefícianse destes recursos Ribadumia, Vilagarcía e Vilanova de Arousa. O presidente provincial, Luis López, asegurou que o goberno provincial segue “tendendo pontes cos concellos e avanzando no reparto de fondos do Plan +Provincia: este ano xa aprobamos preto de 18 millóns para os concellos da provincia de menos de 50.000 habitantes”.
No marco da liña 1 de investimentos, a Xunta de Goberno aprobou que Vilagarcía disporá de 310.000 euros para investir en dous proxectos: por unha banda, 214.220 euros para a mellora de acceso ao Piñeiro pola rúa Wenceselao Fernández Flórez; e, pola outra, 95.787 euros para a ampliación da rede de saneamento e de abastecemento nun tramo do Camiño da Regueira en Fontecarmoa.
No caso da liña 2, de gasto corrente, o presidente provincial informou que a Xunta de Goberno acaba de aprobar 71.782 euros para Vilanova de Arousa, que se repartirán entre a Festa do Momo (21.371 €), Sonatas de verán (21.371 €) e para a promoción de actos culturais do Concello (296.040 €).
Por último, ao abeiro da liña 3, de activación de emprego, a institución provincial aproba esta semana 117.774 euros para que Ribadumia contrate a oito traballadores. En concreto, serán tres peóns de obras públicas, dous mozos de recollida do lixo, un oficial albanel, un monitor de ocio e tempo libre e un técnico de urbanismo.
