Un obradoiro formará a 20 desempregados en Vilanova

Volve á localidade o Obradoiro de Emprego “Vista Real”, que comezará coa súa oitava edición o próximo mes de setembro. A duración será de doce meses
Clausura do último Obradoiro de Emprego "Vista Real" no CDL de Vilanova de Arousa. FACEBOOK
photo_camera Clausura do último Obradoiro de Emprego "Vista Real" no CDL de Vilanova de Arousa. FACEBOOK

A Xunta de Galicia e o Fondo Social de Emprego decidiron apostar de novo por renovar o Obradoiro de Emprego “Vista Real” en Vilanova de Arousa. Cunha subvención que ascende a pouco máis de 500.000€ por parte de ambas entidades, é o oitavo ano que se realiza este proxecto. A el poderán acceder ata 20 vilanoveses desempregados inscritos na oficina de emprego.

Instalación e mantemento de zonas verdes e xardíns será unha das especialidades do Obradoiro. Nela dez alumnos realizarán traballos de mantemento, mellora de xardíns e zonas verdes e elementos non vexetais en distintas zonas do concello.

A outra será promoción turística local e atención ao visitante, que buscará traballar dentro da área de información e asistencia ao turista na ruta ”Mar de Santiago”, na realización de inventario dos recursos turísticos do concello, promoción e comercialización de produtos ou servizos turísticos do entorno local, organización dun Fam Trip para touroperadores e de actividades de destino turístico.

A selección do equipo directivo e docente e dos 20 alumnos que se formarán nas dúas especialidades comezará nos vindeiros días por parte do concello vilanovés. Para maior información, pódese consultar o Facebook do Centro de Desenvolvemento Local de Vilanova de Arousa ou a web municipal.