Luis López pide "traballo e unidade" durante un encontro cos afiliados do Salnés

Vilanova acolleu durante a noite deste domingo un encontro entre o candidato á presidencia do PP de Pontevedra, Luis López, e os alcaldes, voceiros e afiliados da comarca do Salnés, no marco da campaña electoral interna de cara ao Congreso provincial que terá lugar o vindeiro 9 de xullo en Vigo

López asegurou presentarse con “ilusión e preparado” para afrontar os retos que o partido ten por diante, e que aposta polo “traballo e a unidade dun partido forte, que garante estabilidade onde goberna e no que confiar para xestionar os momentos complicados e nas peores situacións. Un partido serio, estable, moderado e responsable”, manifestou durante a xornada.

Neste sentido, o candidato marcou tres obxectivos para a súa etapa ao fronte dos populares na provincia: reforzar o partido nos 61 concellos" coa mirada postas nas municipais do ano próximo", nos que pretenden "mellorar resultados e recuperar alcaldías para o P"P; contribuír desde a provincia "ao cambio necesario en España con Alberto Núñez Feijóo"; e revalidar a quinta maioría absoluta en Galicia con Alfonso Rueda. Para conseguilo, prometeu “traballo, unidade sen fisuras, disposición absoluta e apoio ás xuntas locais”. 

López asegurou que "o PP é o partido da xente e por iso debemos intensificar e recuperar o contacto, intensificar a nosa presencia na rúa, para escoitalos, atendelos e entendelos”.

Por último, agradeceu o “grande apoio” que recibiu dos afiliados da provincia, que lle permitiu entregar 2.363 sinaturas para formalizar a súa candidatura a presidente provincial. “Un éxito colectivo, un xesto de respaldo inmenso para o proxecto e para o conxunto do partido”, concluíu.