Os deputados provinciais de Infraestruturas Públicas e Mobilidade e de Acción Comunitaria e Equipamentos Públicos, Isabel Couselo e Javier Tourís, supervisaron esta mañá en Vilanova de Arousa xunto co alcalde do municipio, Gonzalo Durán, as obras que se están a realizar na EP-9701, a estrada provincial que une as parroquias de Baión e András, e na EP-9703, entre Vilanova e Ponte Arnelas, para a conservación dos seus firmes cun investimento próximo aos 100.000 euros e que supoñen actuar en 1,3 quilómetros destas vías.
A deputada de Infraestruturas Públicas e Mobilidade sinalou que “para este goberno da Deputación é prioritario garantir a seguridade nas estradas provinciais, e por iso os traballos de conservación e mantemento son fundamentais”. Pola súa banda, o deputado Javier Tourís asegurou que “traballamos por e para a provincia de Pontevedra e para mellorar a calidade de vida e a seguridade dos veciños de Vilanova”.
En canto á estrada entre Baión e András, a deputada provincial sinalou que cos traballos desenvolvidos a Deputación anticípase “ao que vai vir despois, a ansiada mellora da seguridade viaria, do trazado, das condicións de accesibilidade e de seguridade e de creación da senda peonil para a veciñanza”. Couselo adiantou que “nos próximos días veremos patente un borrador co trazado de como quedará esta estrada trala mellora, unha demanda e prioridade fundamental tanto para a Deputación como para o Concello de Vilanova de Arousa”.
As actuacións que se están a desenvolver, contempladas dentro do acordo marco que regula as obras de conservación de firmes na rede viaria da Deputación, abranguen algo máis dun quilómetro na EP-9701 Baión-András, cun orzamento estimado de 60.000 euros, e 300 metros na EP-7203 Vilanova-Ponte Arnelas, cun investimento estimado de 36.000 euros.
