A conselleira de Política Social e Xuventude en funcións, Fabiola García, visitou na mañá deste mércores as novas instalacións do centro Princesa Letizia de Amencer-Aspace en Vilagarcía de Arousa, tras o remate das obras de ampliación. O Goberno galego destinou unha axuda de 2 millóns de euros a estas actuacións que permitiron ampliar a súa capacidade en 22 prazas de atención diúrna e nove de atención residencial.
A conselleira en funcións apuntou que, con estas obras, o centro Princesa Letizia poderá chegar aínda a máis familias da comarca do Salnés e da súa contorna ofrecendo unha atención "da máis alta calidade ás persoas con parálise cerebral e ás súas familias". Estas obras financiáronse a través da orde específica para a ampliación ou creación de novos centros de titularidade social e tamén mediante a orde de axudas con cargo ao 0,7% do IRPF.
