O Concello de Vilagarcía xa mantivo varias reunións cos responsables de Mercadona para garantir que os novos restos arqueolóxicos atopados no solar da avenida Valle-Inclán sexan conservados e musealizados. O goberno local defende que a antiga porta que comunicaba o Castro de Alobre co mar debe permanecer ao descuberto e incorporarse ao patrimonio local para o disfrute público de todos os vilagarciáns. Baixo esta premisa, estanse a desenvolver as xestións coa cadea de Juan Roig, de xeito que o convenio que habería que asinar para a posta en valor dos restos da cetárea romana achada anteriormente, inclúa unha actuación semellante para a porta marítima.
O executivo que preside Alberto Varela destaca a relevancia e valor dos vestixios que están saíndo á luz no solar situado ao pé do castro, no lateral que linda co xardín botánico Enrique Valdés Bermejo, de aí a necesidade de deixalos ao descuberto e musealizalos para que Vilagarcía poida seguir coñecendo máis sobre as súas orixes e a forma de vida dos seus primeiros poboadores. Polo tanto, Ravella rexeita por completo a posibilidade de que a porta simplemente se documente e se volva a soterrar. "Nin o goberno nin a cidadanía de Vilagarcía entenderían que se apostase por unha medida que non permitise gozar e admirar o patrimonio local". Como se sabe, a solución final a adoptar dependerá do que autorice a Dirección Xeral de Patrimonio da Xunta de Galicia.
O emprazamento dos restos no lateral dos xardíns Enrique Valdés Bermejo, nunha zona que non se ve afectada polo edificio que acollerá o supermercado, facilitaría a integración da zona arqueolóxica neste parque, dando continuidade ao xacemento do Castro de Alobre e permitindo unha maior comprensión da importancia que para os seus habitantes tiña o comercio marítimo e a explotación dos recursos do mar, actividades ás que se accedía directamente a través da porta recentemente exhumada.
