A Praza de Galicia acolle a primeira venta física dos bonos 'Son da Casa!'
A nova campaña dos bonos 'Son da Casa!' arranca este venres, ás 19.00 horas, coincidindo co prendido do alumeado de Nadal. A partir dese momento, os bonos comercio subvencionados polo Concello poderán adquirirse a través da web sondacasavilagarcia.gal, seguindo as normas habituais. Malia iso, e tamén como se fixo en anteriores edicións, a Concellería de Promoción Económica habilita un punto de venta física para facilitar a compra ás persoas que non se manexen coas novas tecnoloxías ou carezan dos medios para facelo. A carpa instalarase este sábado, 2 de decembro, na Praza de Galicia a partir das 11.00 horas.
Nesta primeira venta física poranse á venta 250 lotes de bonos, estando prevista que a carpa regrese o sábado 16 cun stock similar. O procedemento será similar ao das campañas anteriores: os compradores deben ser persoas maiores de idade e deberán presentar o seu DNI. Igual que no sistema online, só se poderá adquirir un máximo de dous packs de bonos por persoa.
Os lotes custan 20 euros e permiten facer compras por importe de 30 grazas aos 10 euros que aporta o Concello. Os bonos poderanse gastar nos case 300 establecementos comerciais, de hostalaría e pequenos negocios de Vilagarcía que están adheridos á campaña. A oferta é moi ampla, xa que participan dende tendas de alimentación, calzado, téxtil, complementos e perfumerías; ata ferraxerías, tendas de música, perruquerías, carpinterías e paxarerías; pasando por clínicas de fisioterapia ou tendas de informática, bares e restaurantes). Todos eles identificaranse colocando no escaparate o distintivo da campaña de Nadal 23. A lista completa dos establecementos participantes tamén se pode consultar na web 'Son da Casa!'.
Na que xa é a sexta edición da campaña de bonos 'Son da Casa!', o Concello volve a poñer á venta 3.750 packs de bonos co obxectivo de incentivar o consumo no comercio e hostalería local e dinamizar a economía da cidade tras os efectos negativos causados a consecuencia da pandemia e da crise económica, e para axudar aos cidadáns a afrontar un pouco mellor o efecto da inflación nas compras de Nadal.