O alcalde de Vilagarcía, Alberto Varela, visitou na mañá deste xoves os cinco establecementos gañadores do Concurso de Decoración de Nadal co obxecto de facerlles entrega dos diplomas e dos cheques que conleva cada premio. O vencedor da convocatoria deste ano foi a Panadería Lourido pola recreación do pantano de Shrek montada no portal que dá acceso ao despacho de pan situado na rúa Ramón y Cajal. Por este traballo os responsables do negocio recibiron os 595 euros cos que estaba dotado o primeiro premio.
Os dous segundos recaeron na cafetería Village Bakery (situada na Praza de Arcebispo Lago) e na barbería Mike Hair Studio (rúa Romero Ortíz), cada un dos cales recibiu 395 euros, mentres que os terceiros postos foron para a cafetería Diúrno (rúa Valentín Viqueira) e para Cocoe Moda (Rey Daviña), con 200 euros de premio por local.
O Concurso de Decoración de Nadal é unha iniciativa posta en marcha xa hai uns anos pola Concellería de Promoción Económica co obxectivo de animar aos establecementos comerciais, hostaleiros e outros pequenos negocios a engalanar os seus escaparates e locais como medio de dinamizar a súa actividade durante estas festas e, á vez, contribuír a crear ambiente na cidade complementando a iluminación e os xardíns efémeros que pon o Concello.
A elección dos gañadores decidiuse en base aos votos do xurado, que valorou aspectos como a creatividade e a orixinalidade, a iluminación e o uso de materiais naturais ou reciclados.
