A fin de semana festiva en Vilagarcía saldouse coa identificación de tres menores de idade por danos a vehículos estacionados na rúa Manuel Antonio e dúas denuncias a un local de copas por permitir a entrada e a venda de alcohol a menores. Os feitos ocorreron na madrugada do día 24, cando a Policía Local recibiu unha chamada advertindo da queima dun colchón nos soportais da rúa Manuel Antonio. Tras desprazarse ao lugar e apagar o lume, os axentes puideron comprobar que, ademais, había tres vehículos estacionados na mesma rúa, aos que lle foran arrancados os espellos retrovisores.
Os presuntos autores foron avistados pouco despois por uns veciños, que alertaron de tres mozos que perseguían a arrincaban as plumas aos patos no río do Con. Foi así como os axentes puideron localizar e identificar aos tres mozos, todos eles menores de idade, dous residentes en Vilagarcía e outro en Vilanova. Precisamente, ao carecer este último de medios para regresar ao seu domicilio, a Policía Local deu aviso ao seu proxenitor.
As gravacións das cámaras de seguridade dun establecemento da rúa Manuel Antonio serviron para identificar máis tarde aos mesmos tres mozos como causantes dos destrozos nos vehículos, polo que a Policía Local procedeu a instruir as pertinentes dilixencias ante a Fiscalía de Menores.
Posteriormente, na madrugada do domingo 26, a Policía Local tivo que acudir a un local de ocio nocturno da TIR ao recibir a chamada dunha nai á que, segundo manifestou, non deixaban acceder ao interior do establecemento a buscar ao seu fillo "por motivos de aforo". Os axentes acudiron ao lugar pasadas as 2.00 horas, comprobando que no seu interior atopábanse varios menores de idade consumindo bebidas alcohólicas. Como consecuencia, levantáronse as correspondentes actas das dúas denuncias por permitir a entrada e venda de alcohol a menores.
ACCIDENTES. A maiores, entre o 23 e o 26 de xuño rexistráronse catro accidentes de circulación leves e tramitouse un atestado a unha persoa por conducir un vehículo carecendo do preceptivo permiso.
