As festas de San Roque soarán ao ritmo de M-Clan este verán. A banda murciana, unha das máis exitosas dende os anos 90, e xa todo un clásico do rock español, ofrecerá un dos concertos estelares dos festexos, que terá lugar o venres 19 de agosto, cando a característica voz de Carlos Tarque faga soar no Parque da Xunqueira cancións tan populares como Carolina, Quédate a dormir, Miedo ou Llamando a la tierra, a versión do tema da Steve Miller Band.
Como todas as actividades das festas organizadas pola Concellería de Cultura, a entrada ao concerto é de balde e, este ano, estará totalmente libre de restricións sanitarias. Tal e como lembraron dende o Goberno local, o concerto de Vilagarcía, tras a aplaudida xira levada a cabo nos dous últimos anos en dúo e formato acústico debido ás restricións da pandemia, M-Clan volve este ano á estrada con forzas renovadas e recuperando á totalidade da súa banda, polo que o concerto de Vilagarcía promete ser un potente espectáculo en formato eléctrico, no que Carlos Tarque e Ricardo Reipérez deleitarán a o público coa longa lista de grandes éxitos que acumulan na súa extensa traxectoria.
MÁIS CONCERTOS. A actuación de M-Clan durante as festas de San Roque súmase ao que ofrecerá o músico urbano Hens o 12 de agosto e ao que levará a cabo a cantante e compositora chilena Mon Laferte, dando cobertura así a diferentes estilos "na procura de atender os gustos de todo tipo de público", segundo sinalaron dende o Concello.
Por esta mesma razón, apuntaron, as verbenas tamén terán o seu oco no programa das festas deseñado polo departamento que dirixe a concelleira Sonia Outón, que xa confirmou a actuación da orquestra New York para a noite do 18 de agosto, e que terá lugar na Avenida da Mariña.
Neste sentido, dende o Goberno local destacaron as orixes locais de New York, formada en Vilagarcía, e que conta cun repertorio actual que abarca estilos como a cumbia, o merengue ou a bachata, co obxectivo de chegar a todos os públicos.
A orquesta orixinaria de Vilagarcía está composta por 13 persoas (cinco cantantes, catro metais e catro para a base rítmica), e destaca pola súa posta en escena, o seu dinamismo, elegancia e a conexión que logra co público, tal e como sinalaron dende o Goberno local. Así, grazas ao seu escenario móbil de 26 metros de longo por 10,5 de fondo e 10,5 de alto, e dotado de sistemas de son e iluminación de última xeración, o espectáculo está asegurado.
