O Auditorio de Vilagarcía de Arousa é ata o de agora a última parada da exposición 'Galiza, un pobo, unha selección'. A plataforma Via Galega, que leva 8 meeses facendo campaña por toda Galicia a prol da creación dunha selección galega propia, fixou o martes 12 ás 20.00 o acto de inauguración. Contou coa presenza dos integrantes da organización, deportistas de distintas disciplinas como o triatlón.
A exposición consta de 20 paneis. Esta se fundamenta nunha revista na que participan distintos deportistas, como o ciclista Ezequiel Mosquera, a presidenta da Federación Galega de Taekwondo, Mercé Barrientes, o nadador Chano Rodríguez ou a atleta Belén Toimil. Xunto coa revista, tamén existe un xornal e un documental no que 13 deportistas dan a súa opinión sobre a importancia e a necesidade de Galicia conte coa súa selección.
Anxo Louzao, o coordinador de Via Galega. comenta que a campaña é " un percorrido histórico polo deporte galego. Reivindicamos o dereito a competir internacionalmente e oficialmente en todas as disciplinas como selección galega". Ademais, a campaña tamén pretende "loitar pola igualdade de xénero no ámbito deportivo".
"Promovemos un manifesto que asinaron 5.000 persoas, entre eles deportistas relevantes. Agora andamos cunha iniciativa nova relacionada coa campaña con 5.000 sinaturas tamén, na que agardamos chegar a 15.000". Louzao explica que a aspiración galega é realista porque xa existen casos parecidos. "Existen en Europa nacións sen estado, como Escocia ou Gales, que xogan sen ningún problema. Tamén no fútbol gaélico existe xa unha selección galega, queremos que se traslade esa situación a todas as disciplinas. "Somos un pobo, unha nación, temos unha identidade propia e queremos estar representados. O deporte é un elemento fundamental de identidade colectiva no que acougan o nosos sentimentos como o de pertenza a unha comunidade. Queremos entoar o noso himno, cantar os noso cánticos e animar aos nosos deportistas".
