O Campionato Galego de Pump Track da actual tempada terá lugar en Vilagarcía de Arousa. O circuíto homologado da Florida acollerá a competición, cuxa organización correrá da man das concellerías de Deportes e de Turismo, xunto co Arousa Bike BTT, que exercerá de club anfitrión. A cita terá lugar a primeira fin de semana do mes de xuño e está previsto que participen nela preto de 200 deportistas procedentes de diferentes puntos da xeografía galega.
Trala xestión do Concello, e grazas á implicación do Arousa Bike, o circuíto da Florida será escenario dunha das roldas do campionato galego. Co obxectivo de realizar os preparativos e concretar a loxística, un técnico da Federación Galega de Ciclismo visitou na mañá deste luns o municipio para revisar as instalacións deportivas e os espazos existentes na contorna. O técnico da Federación estivo acompañado polos concelleiros de Deportes e de Turismo, Carlos Coira e Álvaro Carou; polo presidente do Arousa Bike, David Janza; e polo director de actividades da Fundación Municipal de Deportes, Juan Miguel Doval.
O goberno local pretende converter a ocasión nun elemento dinamizador. Por iso, a intención é organizar actividades complementarias que contribúan a xerar actividade en torno á cita deportiva.
