Os peregrinos e peregrinas que fagan un alto en Vilagarcía no transcurso do Camiño de Santiago poderán aloxarse no "albergue de quinta xeración" que será "o máis fermoso de Galicia". Así describiu onte a presidenta da Deputación, Carmela Silva, o resultado das obras de recuperación dunha edificación abandonada como era a antiga Casa da Cultura do Carril, por iniciativa do Concello de Vilagarcía, para transformala nunha edificación moderna que serve de miradoiro cara a desembocadura do río Ulla, a ría de Arousa, e Cortegada.
O edificio, que recibiu unha achega de máis de 600.000 euros con cargo ao Plan Concellos, marca o inicio dunha ruta que nos últimos anos aumentou considerablemente no que se refire ao turismo peregrino, e que agora permitirá mellorar a oferta turística do municipio e contribuir ao desenvolvemento socioeconómico de Carril. Por este motivo, o Concello vén de solicitar a súa integración na rede pública de albergues do Camiño, xestionada pola Xunta.
Silva, pola súa parte, quixo parabenizar ao Goberno local "pola boa decisión de recuperar unha edificación abandonada á que outros gobernos anteriores non foron quen de atoparlle un uso", así como por convertela nun albergue "tendo en conta que cada vez o Camiño ten máis capacidade de atracción", co que "O Carril non só acollerá as persoas peregrinas senón que será un espazo dinamizador". A presidenta provincial tamén vaticinou que "cando estea en funcionamento asentaranse no Carril moitos outros servizos, cumprindo coa idea de que o turismo ten que xerar riqueza, actividade económica e emprego nos lugares onde se desenvolve".
O alcalde de Vilagarcía, Alberto Varela, asegurou que "os datos turísticos lévannos a concluír que somos a zona turística máis importante de Galicia, e con todo o que move o Camiño tiñamos que contar cun albergue".
As instalacións teñen capacidade para acoller a 30 persoas, ademais de contar cunha finca para a realización de actividades ao aire libre, unha recepción, lavandería, consignas e unha terraza cunha pérgola vexetal. Todo distribuído nun andar baixo, primeiro e zona baixo cuberta.
