Afonso Eiré presenta este venres en Vilagarcía a súa novela sobre a emigración

En Ausentes, o escritor e xornalista recolle as vivencias dos que, ao longo da historia galega, marcharon aos distintos países de América, de Europa ou outras comunidades do Estado

Afonso Eiré co seu novo libro. DS
photo_camera Afonso Eiré co seu novo libro. DS

O escritor e xornalista Afonso Eiré presentará este venres 28 de outubro, ás 20.00 horas, na Asociación Cultural O Faiado da Memoria de Vilagarcía a súa última novela, Ausentes (Hércules de Ediciones, 2022), que aborda o fenómeno da emigración. O autor estará acompañado polo profesor e historiador Duarte Correa.  

No libro, o escritor e xornalista recolle as vivencias dos que, ao longo da historia galega, marcharon aos distintos países de América, de Europa ou outras comunidades do Estado, pero tamén dos que quedan, xa que “todos sofren de ausencia”. Así, trátase dun o retrato dos esquecidos, dos que triunfaron, dos que quedaron na diáspora e dos que regresaron, ricos ou pobres. Personaxes, persoas, que as lectoras e os lectores seguro son quen de pórlles cara e, aínda, o seu nome propio; mesmo reflectirse nos seus pensamentos e nas súas vidas. 

Concibido como unha historia global da emigración, o que fora director da Nosa Terra tece o relato a partir das vidas dos convidados a unha voda na que todos os asistentes, de forma directa ou indirecta, viviran as consecuencias deste fenómeno.