Un total de 16 obras arquitectónicas realizadas en diferentes municipios recibiron durante a noite deste sábado en Sanxenxo a distinción Gran de Area de Aportación á Arquitectura da man da directora xeral de Ordenación do Territorio e Urbanismo, Encarnación Rivas. Durante o acto, e tras facer entrega dun dos diplomas en nome da Xunta, a directora xeral quixo poñer en valor o papel que xoga a arquitectura desde o punto de vista da ordenación do territorio e á hora de avanzar "cara ao obxectivo común dun urbanismo responsable, sostible e integrado coa contorna".
Os premios, outorgados polas delegacións de Pontevedra, Vigo e Ourense do Colexio de Arquitectos de Galicia (COAG), e que busca recoñecer aquelas obras que pola súa exemplaridade sirvan como mostra do facer arquitectónico do sur da comunidade, naceron en Vigo no ano 2001 co fin de contribuír á harmonía entre arquitectos e promotores para acadar o mellor resultado arquitectónico e construtivo posible.
No marco da edición 2022 destes galardóns a organización recibiu un total de 63 proxectos de moi diversas escalas e localizacións. O pasado mes de decembro as tres delegacións provincias do COAG fixeron público o fallo do xurado e durante a noite deste sábado tivo lugar o acto oficial de entrega de diplomas aos responsables das actuacións premiadas no Auditorio Emilia Pardo Bazán de Sanxenxo, ao que tamén asistiu o director da Axencia de Protección da Legalidade Urbanística, Jacobo Hortas, así como o conselleiro de Sanidade, Julio García Comesaña; a decana do Colexio de Arquitectos de Galicia, Elena Ampudia; o director Xeral de Xustiza, José Tronchonio; a directora Xeral de Relacións Institucionais e Parlamentarias, Blanca García Señoráns; o director da Axencia de Protección da Legalidade Urbanística (APLU), Jacobo Hortas; a deputada de Transición Ecolóxica e Medio Ambiente da Deputación de Pontevedra, Iria Lamas; o alcalde de Sanxenxo, Telmo Martín, xunto a varios membros do Goberno local, ademais doutros representantes de institucións públicas, Consello Galego de Aparelladores e Arquitectos Técnicos e da Escola Técnica Superior de Arquitectura da Coruña.
Nesta ocasión, as obras escollidas englóbanse en máis de 10 tipoloxías diferentes en función do seu carácter urbano, habitacional, industrial, comercial ou paisaxístico, e con escalas tamén moi diversas, que van desde pequenas intervencións, a outras que resolven espazos urbanos a nivel cidade. Entre elas, cómpre destacar a horta e invernadoiro do restaurante Culler de Pau, en O Grove, a única obra premiada na comarca do Salnés polo seu deseño e adecuación ao entorno.