O Plan de Sustentabilidade Turística impulsado polo Concello, Sanxenxo 365 días xa ten a luz verde do Consello da Xunta, que autorizou este xoves a subscrición do convenio de colaboración entre a Axencia de Turismo de Galicia e o Concello de Sanxenxo para a execución do proxecto cun prazo de tres anos, e que conta cun orzamento de dous millóns de euros.
No marco do Plan de Recuperación, Transformación e Resiliencia, financiado polos fondos ‘Next Generation’, o proxecto toca de cheo grandes elementos patrimoniais do municipio que se queren poñer en valor, como é o caso do Centro de Interpretación A Telleira, o Pazo de Quintáns e a senda entre A Fianteira e Os Pasales.
No primeiro caso, prevese o acondicionamento do acceso, a mellora paisaxística, a dotación ecoeficiente e a museografía dixital, ademais de dotar ao espazo de equipamento. No caso do Pazo de Quintáns, este proxecto abordará a fase de dotación ecoeficiente e dixital e posibilitará facer realidade a constitución dun centro de interpretación no propio pazo. Por último, no que respecta á senda, mellorarase o seu entorno.
Cabe lembrar que o Plan de Recuperación, Transformación e Resiliencia inclúe unha liña de investimento de Transformación do modelo turístico cara á sustentabilidade, que inclúe o Programa de Plans de Sustentabilidade Turística en Destinos, co obxectivo de implementar actuacións de impulso da sustentabilidade turística na súa triple vertente: ambiental, socioeconómica e territorial.
De acordo ao procedemento establecido na Estratexia de Sustentabilidade Turística en Destino aprobada na Conferencia Sectorial, o Concello de Sanxenxo concorreu á convocatoria extraordinaria de Plans Territoriais de Sustentabilidade Turística en Destino, presentando o proxecto Sanxenxo 365 días, que foi aprobado na Conferencia Sectorial de Turismo do 21 de decembro de 2021 coa Secretaría de Estado de Turismo e que, no futuro, resultará clave no municipio para acadar os obxectivos de desestacionalización do turismo.
