Unha vivenda unifamiliar en Montalvo, premiada no certame Gran de Area 2023
As Delegacións de Ourense, Pontevedra e Vigo do Colexio de Arquitectos de Galicia veñen de fallar os galardóns dos Premios Gran de Area de Aportación á Arquitectura 2023, que outorgaron unha das súas 13 distincións a unha vivenda unifamiliar situada en Montalvo (Sanxenxo), concretamente no lugar de Arra. O proxecto, a cargo de Rodríguez + Pintos arquitectos, SLP, resultou premiado pola súa calidade, tanto nos espazos proxectados coma nos materiais e técnicas utilizadas. Trátase, segundo a resolución do certamen, dunha proposta de deseño contemporáneo que á súa vez é un exercicio de bioconstrución e eficiencia enerxética. O resultado é un fogar eficiente, sereno e belo, relacionado co seu contorno inmediato, explicaron.
Estas distincións supoñen un recoñecemento ao labor conxunto e necesario de todos os axentes que interveñen no proceso de xestación e construción dunha obra de arquitectura de calidade desenvolta nas demarcacións de Vigo, Pontevedra e Ourense. O obxecto do certame é destacar o valor da obra arquitectónica, unha “pequena pero importante aportación á arquitectura, á creación e á posta en valor da contorna”.
Este ano presentáronse 71 proxectos de moi diversas escalas e localizacións, que son o resultado que aglutina o mellor dos arquitectos e das arquitectas, pero tamén de todos os axentes de obra que os acompañan no proceso construtivo, como son os aparelladores, promotores, enxeñeiros, construtores e demais axentes participantes. Trátase de obras de carácter urbano, habitacional, industrial, comercial ou paisaxístico, e con escalas tamén moi diferentes, desde pequenas intervencións, case estratéxicas, a outras que mesmo resolven espazos urbanos a escala de cidade.
O xurado do concurso estivo composto polos presidentes das Delegacións de Pontevedra e Ourense, Anselmo Villanueva e Emma Noriega; a tesoureira da Delegación de Vigo en substitución do seu presidente, Sonia Alvarado; Alexandra Estefanía Vázquez, colexiada seleccionada entre os premiados dos Premios Gran de Area da edición anterior, consensuado polas tres delegacións; un colexiado de cada delegación seleccionado pola súa Xunta Directiva: Lucía Araujo por Pontevedra, Iago Fernández por Ourense, e Joana Covelo por Vigo; e o secretario da Delegación de Ourense, Antonio Piñeiro, que actuou como secretario do xurado. Segundo a súa valoración, nesta edición os proxectos destacaron en aspectos fundamentais como a recuperación do contorno, o uso de prácticas sostibles e a rehabilitación fronte á obra nova. “Son proxectos que buscan mellorar a calidade de vida, ter un menor impacto ambiental e poñer en valor a contribución de promotores e do resto de axentes que interveñen para facelos posible” –manifestou o xurado–. Despois de horas de intensas liberacións, o xurado seleccionou 13 obras (7 situadas na área de Vigo, 3 na área de Pontevedra e 3 na área de Ourense). Na área de Pontevedra resultaron tamén premiadas a reestruturación dunha vivenda familiar na Rúa Formigueira, número 4, a cargo de Jose Luis Gil Pita, e no concello de Cerdedo-Cotobade, recoñeceuse a recuperación patrimonial e paisaxística dos baños de San Xusto, en San Xurxo de Sacos, a cargo de Cristina García Fontán.