Un total de nove turistas chegados de diferentes puntos do Estado foron os agraciados que gozaron este martes da visita guiada inaugural á lonxa de Portonovo, un percorrido de arredor dunha hora e media que, para moitos deles, supuxo toda unha revelación. "As subastas antigas facíanse a voz, e era complexo para o subastador saber a quen pertencía cada lote. Logo pasouse aos pulsadores, aos mandos e agora á radiofrecuencia e incluso facemos subastas telemáticas a través do Whatsapp". Así conta a responsable de Turismo da lonxa, María Fernández, unha das explicacións que máis chama a atención dos asistentes, que asisten abraiados a unha subasta en directo en cada percorrido.
Para outros, o descoñecemento de que as redeiras non só reparan as redes, senón que tamén as fabrican, resulta extraordinario, no marco dun itinerario que comeza ás 18.30 horas cada martes e xoves durante os meses de xullo e agosto, e que este ano agarda poder abarcar tamén parte do mes de setembro. E é que as previsións son moi boas. "O ano pasado chegamos ás 100 visitas e este ano imos ter tirón, xa temos reservas para agosto. No primeiro día recibimos moitas visitas e agardamos acadar as 100 ou superalas", asegura Fernández.
A experiencia non é para menos. Grazas a ela, as visitas toman conciencia, en primeiro lugar, da «importancia da pesca en Portonovo e como evolucionou o pobo e as artes de pesca», conta. Neste sentido, axudados polas miniaturas na sala de artes de pesca, os guías explican tamén ao turismo de xeito detallado cada arte de pesca que se practica na vila e as súas capturas asociadas, repasando tamén a actividade das redeiras, a importancia de protexer o medio ambiente e o comercio minorista. Tras a visita, ás 19.00 horas comeza a subasta, e a visita finaliza no peirao, onde os asistentes poden coñecer in situ as embarcacións de captura de polbo, os barcos do cerco ou de enmalle, e continúan cara a nave de redeiras.
A actividade, que agarda xerar moita expectación esta tempada, ten un prezo de 9 euros para adultos, 6 para cativos de entre cinco e 12 anos, e gratis para o resto.
"Este vai ser un ano de nécora"
