Flores de Portonovo ao mundo

Novo reto para florearte ▶ Tras converterse na mellor florista a nivel estatal, a sanxenxina Patricia Aguín prepárase para dar o salto ao campionato mundial que se celebrará en Mánchester, un reto que afronta apoiada por un equipo de 10 persoas e con formación intensiva
Patricia Aguín este mércores durante unha xornada de traballo en Florearte. JOSÉ LUIZ OUBIÑA
photo_camera Patricia Aguín este mércores durante unha xornada de traballo en Florearte. JOSÉ LUIZ OUBIÑA

Cando con 23 anos Patricia Aguín comezou a traballar cóbado con cóbado na floristería da súa nai tras rematar a carreira de Enxeñaría Forestal, non podía sequera imaxinar que 13 anos despois se vería convertida na mellor artesá florista de España, un título que acadou o pasado mes de outubro en Toledo, nin que estaría a punto de dar o salto a nivel mundial. E é que, tan só uns meses despois de facerse co título de Mellor artesá florista no certame organizado por Interflora, Aguín asume "cunha responsabilidade moi alta e algo de nervios" o reto de concursar no Interflora World Cup 2023, que se celebrará os vindeiros días 7,8 e 9 de setembro en Mánchester (Inglaterra).

Pero, para afrontar este momento, que de seguro marcará un antes e un despois na súa carreira, Aguín non está soa. A súa preparación de cara ao certame xa comezou e, dende hai varias semanas, conta cun equipo de profesionais dunhas 10 persoas coas que aborda de xeito incansable a preparación da proba. "Agora mesmo estamos practicando técnica floral. No mundial levas tres traballos xa estructurados desde a casa e logo hai probas sorpresa, polo que a partir de abril serán eles os que veñan aquí para preparalo todo", explica. Polo momento, Aguín é quen viaxa para recibir formacións a Sevilla, e precisamente esta semana viaxará a Valencia, para lograr dar o mellor de si mesma da man de profesionais floristas que, en moitos casos, son antigos e antigas concursantes do certame.

Patricia Aguín este mércores durante unha xornada de traballo en Florearte. JOSÉ LUIZ OUBIÑA
Patricia Aguín este mércores durante unha xornada de traballo en Florearte. JOSÉ LUIZ OUBIÑA

E, para aspirar a unha boa posición en Mánchester, a esta profesional non lle faltan ideas. Nin apego á súa terra. "A temática vai sobre a nai terra, e o que se premia é a sostibilidade, polo que para as tres composicións que hai que levar estruturadas, farei unha sobre os bosques, outra sobre o mar, e outra sobre as nubes, con materiais de aquí, para que leve algo de Galicia. Bosques, mar e nubes, aquí temos abondo", conta.

UNHA VIDA ENTRE FLORES. Para Patricia Aguín as flores son algo máis que a súa profesión, son a súa vida. Non lembra un momento nin un recuncho da infancia no que non estivera arrodeada delas, e iso débello á súa nai, que a criou nunha pequena floristería que rexentaba tamén en Portonovo. "Cando rematei a carreira e non tiña claro por onde tirar, miña nai propúxome traballar xuntas. Ela é florista de toda a vida, comezou en invernadoiros e logo abriu a floristería. Eu estiven sempre entre flores. Cando eu comecei con ela cambiámonos a un local máis grande, que é o Florearte que temos agora (Rúa Areal, 4), e aquí seguimos as dúas", explica. E comezou a aprender cada vez máis. "Miña nai sempre me insistiu moito na formación, e iso foi o que fixen, a través de diferentes cursos. O malo na floristería é que para formarte tes que ir á privada, e creo que iso é algo que estaría ben cambiar", reivindica.

Patricia Aguín este mércores durante unha xornada de traballo en Florearte. JOSÉ LUIZ OUBIÑA
Patricia Aguín este mércores durante unha xornada de traballo en Florearte. JOSÉ LUIZ OUBIÑA

E un día decidiuse a dar o paso. "Anoteime no concurso a nivel España despois da pandemia, animada polas compañeiras. O que pasou ese ano é que mudou de data, e eu polas vodas que tiña previstas xa non podía ir, pero lanceime o ano seguinte. Como non me gusta moito competir, fun a probar sen presión, porque mo pedían as compañeiras, houbo 10 probas, e vin que nas dúas primeiras sentíame cómoda", lembra.

Agora, e cun futuro máis que prometedor chamando á súa porta, Aguín prantexa buscar unha saída profesional no eido da formación. "Estanme saíndo moitas oportunidades para cursos e demostracións e quizais o cambiaría polo horario de tenda, pero sempre no eido das flores", afirma.

A sede:
O Priorato de Arra como centro de operacións
O emblemático Priorato de Arra converterase durante as vindeiras semanas na sede da preparación da proba a nivel mundial na que participará Patricia Aguín, despois de que o Concello lle dera luz verde. «Precisabamos un espazo grande para todo o equipo e na miña casa non podía ser, pedímosllo ao Concello e cedéunolo, e estou moi agradecida», asegura.

Muller Inspiradora
Aguín vén de recibir o recoñecemento como Muller Inspiradora outorgado polo Concello de Sanxenxo no marco do 8-M.