Entre un 50% e un 60% é o aforro enerxético que a Confraría de Pescadores San Roque de Portonovo estima acadar coa instalación de máis de 180 placas fotovoltaicas, despois de que o pico de gasto en electricidade durante os últimos meses chegara a triplicar ao ano anterior. "No mes de xullo tivemos un gasto de 9.000 euros en luz. O ano pasado gastamos 3.000 euros e xa foi bastante, pero isto é unha esaxeración", valora o patrón maior, Juan José Besada.
Os paneis solares, que xa se comezaron a instalar na cuberta da lonxa, uniranse aos que actualmente xa abastecen á cantina, se ben estas novas placas destinaranse "a alimentar a fábrica de xeo, que é o que mais consume". Deste xeito, dende a confraría estiman que a instalación ao completo poderá comezar a funcionar o vindeiro mes, conseguindo unha notable redución do consumo, se ben o funcionamento da fábrica de xeo excede con moito o rendemento das placas. "A máquina funciona todo o tempo, mentres que as placas pola noite non son operativas", sinala o patrón maior, quen destacou que este sistema só está permitido "para o autoconsumo e, por moito xeo que vendamos, nós non gañamos cartos con isto. Simplemente é un servizo necesario porque a lonxa precísao para poder funcionar".
A decisión de abastecer á fábrica de xeo parcialmente mediante paneis solares tomouse hai xa varios anos, se ben o proceso para completar a obra supuxo diferentes trámites que o dilataron no tempo. "Tomamos a decisión a raíz dunha factura de agosto de 6.000 euros, e coa subida da luz non nos quedou mais remedio", sinala o patrón maior, quen tamén lembrou que "as placas pedíronse hai tres anos, pero estes procedementos son lentos e nunca se sabe".
A actuación levouse a cabo mediante unha subvención da Consellería do Mar por un importe de 65.000 euros resolta o pasado mes de xullo, dentro do programa do FEMP de fomento da competitividade e a viabilidade das empresas do sector da pesca con inclusión da pesca costeira artesanal, e mellora das condicións de seguridade e traballo dos portos pesqueiros, lugares desembarco, lonxas e ancoradoiros.
"Gustaríame rematar proxectos así como patrón"
Neste sentido, Besada presténtase á xunta directiva, así coma o 90% dos actuais membros, polo que estima que o resultado de cara ás eleccións debería ser semellante ao actual.
Cabe lembrar que o pasado marzo de 2021 deuse por finalizado o proceso mediante o que catro membros da xunta xeral da confraría dimitiran para forzar eleccións, e no que Juan José Besada saiu reforzado. Agora, e tras completar a lexislatura natural, Besada postúlase a continuar no posto, tendo en conta a minoría dos membros contrarios.