El Combo Dominicano, Panorama e Marbella, nas festas patronais de Vilalonga

Un dos eventos verbeneiros máis importantes do Salnés volve logo do parón obrigado pola pandemia

<p> Actuación de El Combo Dominicano en 2021. GONZALO GARCÍA </p>
photo_camera Actuación de El Combo Dominicano en 2021. GONZALO GARCÍA

As festas patronais de Vilalonga, unha das citas verbeneiras máis importantes da comarca do Salnés, recuperan o pulso tras a pandemia, e veñen de publicar o cartaz da súa edición 2022, que se celebrarán entre os días 28 de xuño e o 16 de xullo.

Na víspera de San Pedro (28 de xuño) haberá tirada de bombas pola mañá e verbena a partir das 22.30 horas, a cargo de El Combo Dominicano e Marbella. O día 29, na Festa de San Pedro, tras a tirada de bombas haberá alborada con Os Cruceiros e Os do Barro. A partir das 13.00 horas terá lugar a misa cantada e a procesión e pola noite actuarán La Oca Band e Os Satélites. En San Antón e San Roque, o día 30, repetirase a mesma fórmula con alborada a cargo de Os Cruceiros, misa, procesión e verbena, esta vez coas orquestas Panorama e Claxxon.

Cartel de las fiestas patronales de Villalonga
Cartel de las fiestas patronales de Villalonga

O domingo 3 de xullo a parroquia celebrará a Festa do Sacramento, con tirada de bombas, misa cantada e procesión, mentres que o domingo 10 terá lugar a Festa da Bicicleta-Festa do Neno, coa apertura de inscricións ás 9.30 horas no campo da festa. Ás 10.30 horas comezará a Festa da Bicicleta con saída e volta na Praza Pública, e que percorrerá toda a parroquia. Ao remate, entregaranse as medallas para todos os participantes, e haberá agasallos e sorteos.

Ás 17.00 horas dará comezo a Festa do Neno, con inchables que se instalarán no campo do Revel, un mini aquapark composto de tobogán acuático, inchables acuáticos, e que contará con música e monitores que atenderán aos cativos.

Xa o sábado 16 celebrarase a Festa do Carmen, que comezará coa tirada de bombas pola mañá. Ás 10.30 horas sairá a Virxe da igrexa de Vilalonga ata o lugar de Rouxique, onde se celebrará a misa ás 11.00 horas, para continuar en procesión ata As Cachadas, lugar de inicio da tradicional Romaría do Carmen, na que participarán Os Cruceiros e a Banda Militar da Brilat de Pontevedra. Ás 15.00 horas haberá sardiñada, coa actuación de Prisma e Punto Cero e ás 19.00 horas a xornada festiva rematará con misa e procesión.