Carne de poldro 100% raza autóctona no Obradoiro de Hostalería do Salnés

O Obradoiro de Hostalería do Salnés XV, promovido pola Mancomunidade do Salnés e subvencionado pola Consellería de Emprego e Igualdade, celebrou este mércores unha xornada de exaltación da carne de poldro galego 100% raza autóctona.

Nesta ocasión, o obradoiro contou coa participación de PURAGA (Asociación de criadores do cabalo de Pura Raza Galega), nun evento financiado polo Fondo Europeo Agrícola de Desenvolvemento Rural e polo Ministerio de Agricultura, Alimentación e Medio Ambiente. Como parte da súa labor de promoción nas escolas de hostalería e centros gastronómicos, Laura Peteiro , veterinaria de PURAGA, ofreceu unha charla explicando as características da raza, o seu sistema de cría tradicional e sostible, a súa alimentación. Destacou as propiedades e o sabor desta carne única. Deste xeito, os asistentes tiveron a oportunidade de experimentar de primeira man a calidade incomparable de esta carne da man de Rocío Garrido, creadora do blog La Cocina de mi abuelo, foi a encargada de  elaborar diferentes receitas coa carne deste animal: steak tartar, goulash e tiras de poldro salteadas con pementos e cebola. 

A xornada finalizou coa degustación por parte de todas as persoas participantes das distintas elaboracións cociñadas no showcooking.

O evento, que contou coa participación de hostaleiros da zona, serviu como un encontro enriquecedor onde se intercambiaron ideas e se exploraron novas formas de incorporar a carne de poldro autóctona na oferta gastronómica local.