Monstruosas si, pero con moito, moito chocolate. Así resultaron as creacións do obradoiro de cociña con temática do Samaín que tivo lugar durante a tarde deste luns na Rúa dos Viños de Portonovo, dirixido aos máis pequenos da casa, que ateigaron o popular enclave hosteleiro da vila de disfraces e brincadeiras no seu día grande de programación, que xa deu comezo o pasado sábado e que continuará ata este martes, 1 de novembro.
Bruxas, espíritos e pequenos diaños percorreron os locais para visitar a exposición de cabazas decoradas que a Asociación da Rúa dos Viños, organizadora da cita, recolleu durante os últimos días, e para recibir as súas doses de larpeiradas durante o Truco ou trato, outra das actividades enmarcadas no programa festivo, que tamén contou cun obradoiro de manualidades e, como cada ano, co popular concurso de disfraces para as categorías infantil e adulta, que repartiu diferentes premios entre os gañadores e gañadoras.
Ademais, os locais da asociación, que este ano conseguiu recuperar a súa cita máis sinalada no calendario outonal, dispoñen dun menú de comidas e ceas especiais coa temática do Samaín, así como packs de merenda terroríficos para os comensais que se acheguen durante estas xornadas ao lugar. A decoración a pé de rúa, con lápidas, pantasmas pendurados das árbores, bolsas do lixo radioactivas e comensais esqueléticos agardando as súas racións convertéronse, un ano máis, en todo un parque temático para a cativada que, despois da pandemia, puido volver gozar dun Samaín portonovés por todo o alto.
