Dende este venres, 15 de marzo, e ata o 5 de abril, a Escola de Educación Infantil de Ribadumia abre o prazo de reserva de prazas para o alumnado de novo ingreso para o vindeiro curso 2024/2025 que comezará o 2 de setembro.
A oferta total de prazas é de 45, seguindo o seguinte reparto: 15 para aulas de bebés (0-1), 23 para as aulas de 1-2 anos e 7 para as aulas de 2-3 anos.
As familias interesadas poderán recoller a documentación necesaria tanto nas instalacións da propia escola como no Concello de Ribadumia. Documentación que deberán entregar despois cuberta na Casa Consistorial.
O Concello de Ribadumia e a propia Escola de Educación Infantil esperan unha gran acollida por parte das familias e permitir así unha mellor conciliación familiar.
