O Concello de Ribadumia instala novos taboleiros informativos en distintos puntos do municipio

Ribadumia substituíu algúns dos taboleiros informativos existentes no municipio por outros novos, pois, segundo indican dende o ente local, víase unha necesidade de cambialos debido ó estado deteriorado en que se atopaban, xa que o material do que están feitos se atopaba en malas condicións, resultado tamén da acción dos axentes atmosféricos. 

Estas accións leváronse a cabo para dar continuidade ó cambio de taboleiros que se fixo o ano pasado, correspondente ó Plan Concellos 2018, en que se cambiaron 10 taboleiros cun orzamento de 5.360,30€. Isto seguirase desenvolvendo ata lograr que todos os taboleiros informativos de Ribadumia sexan substituídos. 

Estes elementos teñen unha estrutura tubular de aceiro con tellado a dúas augas con chapa pregada e lacada en quente, en cor marrón. O taboleiro é de chapa con aglomerado de caucho para exterior, resistente ó sol e intemperie e miden 2100 (alto) x 1700 (ancho) mm, cuncha suxeición mediante ancoraxes metálicas.  

En total, instaláronse 22 taboleiros informativos, repartidos xeograficamente polas parroquias do concello; colocándose 3 unidades en Sisán, 4 en Barrrantes, 3 en Ribadumia, 2 en Besmaño, 6 en Leiro e 4 en Lois. Este proxecto está incluído na subvención do Plan de Obras e Servizos (Plan Concellos) 2022 e as obras executáronse cun importe de 14.840,65€.

O Concello de Ribadumia planificou estes cambios coa finalidade de mellorar a imaxe do municipio, homoxeneizar os soportes informativos e respectar a estética do rural, non só co deseño destes paneis, senón tamén cos seus materiais e cores integradas no entorno.