As instalacións e edificios municipais están sometidas a continuos procesos de coidado e melloras, como é o caso da Casa Consistorial e do edificio de Servizos Sociais, onde se executaron melloras nas instalacións térmicas e na envolvente térmica, respectivamente. As actuacións supuxeron un investimento de 54.203,90 euros financiados nun 72% polo Fondo de Cooperación Local Adicional.
O obxectivo principal destas obras é mellorar o sistema de acumulación e subministro existente coa substitución dos elementos de xeración de calor actuais (caldeira de gasoil) por outra solución máis eficiente, instalando unha bomba de calor aire-auga reversible. Con esta adquisición, asegúrase un uso racional da enerxía e un funcionamento ecolóxico debido ao emprego de refrixerante non prexudicial para o medio ambiente.
Pola súa parte, no edificio de Servizos Sociais, realizáronse melloras na envolvente da zona ampliada da edificación executando un revestimento por medio do Sistema de Illamento Térmico Exterior (SATE), de cara a acadar unhas condicións de servizo e reducir o consumo da instalación. Este illamento evita atopar pontes térmicos no edificio, polo que a inercia térmica do edificio mellora e, en consecuencia, tamén mellora a habitabilidade e o confort térmico. Ademais, illar a fachada tamén mellora o aforro económico e enerxético.
