Este sábado, o Concello de Ribadumia estreou o Nadal do ano 2023 coa inauguración do acendido de luces. Fíxoo ás 20.00 horas na Praza do Concello coa presenza da veciñanza de Ribadumia e arredores, e en colaboración coa asociación de comerciantes Ribadumia Agárdate.
Este evento resultou ser todo un éxito, superando as expectativas do equipo de goberno, pois a afluencia de asistentes chegou ás 400 persoas. Despacháronse, en total, 50 litros de chocolate quente e 12 kg de rosca, esgotando todas as existencias.
Ademais, cada persoa recibía un ticket coa súa consumición para participar no sorteo de agasallos que o Concello de Ribadumia e os colaboradores quixeron repartir entre todos os asistentes. Había un total de 300 tickets que non chegaron para todas as persoas que asistiron á cita inaugural do Nadal.
O goberno local mostrou o seu profundo agradecemento a todos os asistentes que decidiron compartir a súa tarde do sábado na Praza do Concello degustando chocolate e rosca e escoitando panxoliñas. Este agradecemento esténdese tamén a todos os traballadores e traballadoras municipais que estiveron preparando antes, durante e despois da xornada para que todo saíse ben; sen esquecernos tamén de todos os colaboradores, que coa súa axuda foi posible que o evento desta fin de semana fose todo un éxito un ano máis.