O concerto de Budiño foi o broche de ouro a esta primeira fin de semana da LIX edición da Festa do Marisco do Grove, que tivo unha gran afluencia de visitantes.
O gaiteiro moañés subiuse ao escenario da Carpa de concertos na noite deste domingo para interpretar ante unha gran multitude un repertorio variado das súas mellores melodías.
Este foi o acto central deste primeiro domingo da Festa do Marisco, á que se achegaron milleiros de visitantes chegados desde diferentes partes de España e de Europa.
Tras o tradicional VII Encontro de Vespas e Lambretas que tivo lugar pola mañá, os máis pequenos e pequenas puideron gozar na xornada vespertina das actividades infantís e os xogos tradicionais na contorna da Praza do Corgo.
E o outro acto destacado da do día foi o Concerto de Habaneras da Coral Polifónica a Cofraría de Pescadores San Martiño do Grove, que ás 20 horas actuou no Auditorio do Grove.
Ao longo desta semana seguirase vendendo o mellor marisco nos stands das Carpas Degustación e na Carpa de concertos actuarán bandas locais como David Chiquillo, A banda do sequío ou Fla Meco.
A Festa factura 224.000 euros na súa primeira fin de semana
A primeira edición da Festa do Marisco post pandemia está a ter un éxito incontestable. Dende o inicio da festa e ata o peche de caixas de este domingo, sobre as 16.30 horas, a organización rexistrou unha facturación total de 224.283 euros, cun total de tickets entregados de 40.815.
A xente respondeu á chamada do Concello para participar nunha das festas grandes da vila. Tal é así que o sábado e o domingo, repartíronse unha media de 1.000 racións por hora.
A meirande parte dos comensales que se achegaron nesta fin de semana procedían de Pontevedra, seguidos da Coruña, e de Madrid, Asturias e Barcelona a nivel estatal. A Festa do Marisco traspasa fronteiras e xentes de Portugal, Francia, Reino Unido ou Alemania non dudaron en probar as numerosas degustacións ofertadas nesta cita gastronómica.
