O arroz de marisco e o polbo triunfan nos primeiros días da Festa do Marisco

Na primeira fin de semana despacháronse un total de 2.653 racións de arroz con marisco e 2.577 de polbo á feira
Edición de 2022 de la Festa do Marisco. JOSÉ LUIZ OUBIÑA
photo_camera Las carpas de la Festa do Marisco recibieron gran cantidad de visitantes durante los primeros días. JOSÉ LUIZ OUBIÑA

Durante os primeiros días da Festa do Marisco o arroz de marisco e o polbo á feira foron as dúas receitas máis cotizadas nas carpas de degustación. Cun total de 2.563 racións de arroz e 2.577 de polbo, colocáronse á cabeza de demandas, seguidas polas 1.875 de zamburiñas, 1.869 de navallas,1.256 de croquetas de marisco, 1.216 de mexillóns, 1.122 de ameixas e 1.022 racións de mexilóns ao vapor.

O alcalde, José Antonio Cacabelos, fixo unha valoración “moi positiva da primeira fin de semana desta Festa do Marisco, cunha gran afluencia de visitantes desde diferentes partes de Galicia, España e mesmo Europa”.

“Tanto as carpas de degustación como os concertos estiveron ateigados de xente que veu a probar o noso marisco e a escoitar os concertos, coa actuación de Xoel López como momento álxido da fin de semana, enchendo por completo a carpa” engadiu o rexedor.

“Ao longo de toda esta semana imos recibir a visita de varios grupos turísticos concertados, e logo cara a fin de semana agardamos que o tempo siga acompañando para volver a vivir a Festa do Marisco no seu máximo esplendor” concluíu o Alcalde.

A Festa do Marisco e a música local

As bandas locais serán as encargadas de darlle o toque musical á Festa do Marisco ao longo desta semana, agardando a segunda fin de semana do evento.

David Chiquillo xunto a Antonio Casado, A Banda do Sequío e Fla – Meco encherán de boa música a Carpa de Concertos o martes, mércores e xoves, respectivamente. 

O martes, David Chiquillo, acompañado á guitarra por Antonio Casado, interpretarán versións de rock e soul desde as 22:00 horas. O mércores, A Banda do Sequío subirase ao escenario para aportar un toque máis bailable e á súa vez máis tradicional, e o xoves Fla – Meco deleitará aos asistentes coas súas mellores rumbas.

Mais a música na Festa do Marisco non só é de lecer nocturno. O martes pola tarde o grupo Luga actuará na Carpa Cafetería, ás 19:30 horas; o mércores será a quenda para o grupo Mos ás 19:30 horas, tamén na Carpa Cafetería, e as Pandereiteiras Adro Vello, que amenizarán na Carpa Degustación; e o xoves, as pandereiteriras ASXUPEN ofrecerán os seu repertorio na Carpa Degustación a partir das 20 horas.

Segundo apunta o alcalde, José Antonio Cacabelos, “desde o noso equipo de goberno apostamos pola música local, ofrecendo ás bandas un escaparate idóneo para mostrar a súa música ao público, con milleiros de visitantes chegados de diferentes partes da xeografía galega e española”.