Esgotadas en media hora as prazas para as rutas dos 'Bosques Terapéuticos' de maio
En pouco máis de media hora esgotáronse as 120 prazas das oito rutas dos Bosques Terapéuticos programadas pola Deputación para o vindeiro mes de maio. E ao igual que ocorreu cos itinerarios de abril, a Illa de Tambo volveu ser a ruta máis demandada, de xeito que as prazas para este espazo natural cubríronse en cuestión de minutos.
Os percorridos do mes de maio terán lugar todos os sábados e domingos e espallaranse pola Fervenza do Toxa (Silleda), o Lago de Castiñeiras (Vilaboa-Marín), a Carballeira de San Xusto (Cerdedo-Cotobade), a Illa de Tambo (Poio), a Ruta da Pedra e da Auga (Meis), o Río Eifonso (Vigo) e pola contorna da Ponte Colgante do Lérez (Cerdedo-Cotobade e Campo Lameiro). O domingo 21 terá lugar o roteiro pola Ruta da Pedra e da Auga.
A inscrición para os baños de bosque de xuño abrirase o 15 de maio, mentres que para as de xullo arrancará o 12 de xuño e para as de agosto, o 17 de xullo. En todos os casos, este prazo rematará dous días antes da ruta. As persoas interesadas da provincia poden formalizar a súa solicitude a través da páxina web da Deputación. Para cada un dos percorridos ofertaranse 15 prazas, tendo en conta as especiais condicións de tranquilidade e respecto á natureza que se necesitan para o desenvolvemento da actividade. Por iso as visitas, destinadas a público xeral (os e as menores deberán ir acompañados) e cunha duración de entre hora e media e 2 horas, comezarán ás 10 horas para a procura de tranquilidade e conexión coa natureza. Ademais as persoas participantes deberán gardar as normas de silencio e de respecto ao grupo, á actividade e ao espazo, indicadas pola persoa guía.