Tras tres días adicados a exaltación dos caldos dunha vintena de bodegas establecidas no municipio, Meaño clausurou onte por todo o alto a XXI edición da Festa do Viño, antigamente coñecida como Festa do Viño de Autor. Durante esta fin de semana os asistentes tiveron a oportunidade de gozar de tódolos viños da contorna. Segundo o alcalde da vila, Carlos Viéitez, «este formato máis amplo acolle, independentemente do tamaño da adega, tanto ás adegas grandes, como ás medianas e tamén ás artesanas».
A clausura deste evento contou onte co pregón a cargo da xornalista Patricia Pardo ao mediodía e, como broche final, a actuación da Orquestra Grupo América de Vigo. No pregón a xornalista de Santiago destacou a importancia do albariño para a contorna do Salnés. "Meaño -dixo- é abrir os balcóns e mirar ao mar aberto, é terra de viñedos que parecen feitos para envolver soños que cambian de cores coas estacións".
Outra das novidades que salientou o Concello respecto a edicións anteriores foi a diferenciación de tres zonas: unha carpa de 400 metros cuadrados para os stands das 21 adegas participantes, unha zona gastronómica nun espazo arbolado e, por úlitmo, unha zona destinada aos eventos musicais.
O balance da festa foi moi positivo, xa que todos os eventos planificados polo Concello para toda a fin de semana contaron cun gran número de asistentes, segundo afirmou Viéitez. Entre todas as actividades a novidade deste ano foron as catas. "Os ingredientes do éxito foron o novo formato que gusta moito, o elevado número de adegas participantes e eventos musicais importantes durante os tres días", declarou o alcalde.
Ademais, nesta edición presentouse a primeira Confraría de Gastronomía e Viño ‘Corazón do Salnés’ formada por viticultores, bodegueiros e restauradores das sete localidades de Meaño co obxectivo de fomentar e divulgar a cultura do viño e a cultura gastronómica do Concello.
