Todo en marcha para que a Illa de Arousa reciba ás súas Maxestades de Oriente. O Goberno local deste municipio arousano céntrase nos preparativos que garantan unha marabillosa recepción a Melchor, Gaspar e Baltasar. Os Reis Magos arribarán ao porto do Xufre a tarde do xoves, 5 de xaneiro, ás 17.30 horas. Farano a bordo de 'O Rei do Mar', un nobre galeón que a asociación cultural Dorna da Illa converteu hai uns anos en barco escola a fin de ensinar o xeito tradicional de navegación e que porá a disposición das Súas Maxestades no tramo final da súa travesía ata a Arousa.
No porto, unha carroza de 16 metros de longo esperará ao séquito real. Compartirán unha plataforma, cedida pola empresa Marconsa, ambientada coa maxia que corresponde a unha recepción real e deseñada para trasladar aos máis cativos a un mundo de ilusión. Alí, no Xufre, o Goberno local convida a toda a veciñanza a recibilos e a acompañalos despois nun percorrido que este ano será máis curto que en edicións anteriores, xa que, segundo fontes municipais, as dimensións da carroza limitan o seu acceso a moitas rúas.
Desde O Xufre circularán polo Cantiño ata O Campo e de aí seguerá ata o Auditorio, onde terá lugar unha sesión de contacontos que, ademais, seguerán as Súas Maxestades desde o escenario, para acompañar á cativada nesta tarde especial.
"Confío que a carroza guste máis que a do ano pasado e que pequenos e maiores desfruten dunha tarde especial. Como sempre, estamos a contar coa colaboración tanto do persoal municipal como de asociacións e empresas para conseguir que a tarde do 5 de xaneiro sexa especial”, apuntou o concelleiro de Servizos da Illa, Luis Arosa.
