O conselleiro de Sanidade da Xunta de Galicia, Julio García Comesaña, mantivo esta mañá de martes no Hospital do Salnés unha xuntanza técnica co rexedor do Concello de A Illa de Arousa, Carlos Iglesias Cores na que, acompañados polo xerente da Àrea Sanitaria de Pontevedra e O Salnés, José Flores Arias e pola directora do Distrito Sanitario de O Salnés, María Gómez-Reino, analizaron a cobertura de Atención Primaria nesta localidade.
O conselleiro de Sanidade sinalou ao rexedor arousán que, tras efectuar xestións organizativas, a Administración Sanitaria Pública galega foi quen de manter a totalidade de efectivos asistenciais para acadar a cobertura sanitaria de Atención Primaria do Concello de A Illa de Arousa tanto na atención de Medicina de Familia coma en Pediatría.
Cómpre sinalar que o centro de saúde da Illa de Arousa presta cobertura a un total de 4.603 tarxetas sanitarias, das que 465 son de menores de 15 anos. A poboación deste Concello reduciuse gradualmente nun 5,5% nos últimos dez anos.
Modernización das infraestruturas en Atención Primaria en A Illa de Arousa
No transcurso desta xuntanza técnica lembrouse así mesmo a mellora e modernización das infraestruturas en Atención Primaria en A Illa de Arousa, que foron unha prioridade para a Xunta de Galicia en colaboración co Consistorio arousán. Deste xeito, se traballou para poñer á disposición da cidadanía unha infraestrutura modernizada, con capacidade de resolución asistencial, de alto nivel de calidade e no lugar máis próximo aos pacientes.
Entre mellora e ampliación, tras as obras executadas pola Xunta de Galicia en A Illa de Arousa, a superficie do seu centro de saúde pasou dos 402 metros cadrados ata acadar os 532 metros cadrados, o que supuxo unha ampliación do 28%.