O programa 'Degusta Europa' leva á Praza de Abastos de Cambados 800 tapas
O programa da Deputación 'Degusta Europa' aterrou onte na Praza de Abastos de Cambados, onde a veciñanza da vila e as persoas traballadoras do mercado municipal desfrutaron de máis de 800 tapas elaboradas polo alumnado do CIFP Carlos Oroza con produtos da provincia de quilómetro cero. Zamburiña gratinada, mexillóns á crema, larpeira de sobremesa, e ponche de Sansón e queimada 4.0, para beber, foron as tapas que compuxeron o menú que o alumnado do centro de formación profesional pontevedrés deseñou para a ocasión.
'Degusta Europa' trátase dunha iniciativa impulsada pola Deputación para destacar o Día de Europa, que se celebra cada 9 de maio para conmemorar a firma da 'Declaración de Schuman'. O obxectivo principal desta iniciativa é poñer en valor os produtos de quilómetro cero da provincia e dinamizar os mercados e prazas municipais para darlles un toque de innovación e vangarda gastronómica da man do alumnado e o profesorado dos centros Carlos Oroza de Pontevedra e Manuel Antonio de Vigo.
A edición deste ano está ligada á campaña de turismo 'Orixe Rías Baixas' e pretende render unha homenaxe á gastronomía das avoas da provincia, recuperando receitas tradicionais e reinterpretándoas con produtos locais para defender o patrimonio inmaterial dos pobos da Unión Europea: a gastronomía.
En Cambados todas as elaboracións foron preparadas polo alumnado do CIFP Carlos Oroza, que foi tamén o encargado dos menús da cita de Redondela, que tivo lugar o día anterior, e da de Pontevedra, que será hoxe venres. Pola súa banda, o CIFP Manuel Antonio de Vigo preparará as degustacións dos outros tres mercados municipais que participan nesta edición de 'Degusta Europa': Tui (26 de abril), Baiona (3 de maio) e Vigo (4 de maio).