Merchi Álvarez pon en marcha unha hucha solidaria para afrontar o seu tratamento en Corea

A veciña de Cambados precisa 80.000 euros para costear a terapia que reduce os efectos da enfermidade ▶Dende o Sergas e a Xunta poñen trabas sempre que intenta solicitar un encontro directo cos responsables das entidades 
Merchi Álvarez en la comparecencia de esta mañana en el salón de plenos del Concello. DP
photo_camera Merchi Álvarez en la comparecencia de esta mañana en el salón de plenos del Concello. DP

A cambadesa Merchi Álvarez segue loitando contra a Atrofia Muscular Espinal (AME) que sofre dende fai anos, e pola que precisa un tratamento coreano que frea o seu avance. Tras unha primeira sesión o pasado ano, da cal o resultado foi moi satisfactorio, Merchi tería que ter feito a segunda sesión no primeiro semestre de 2022. Solicitou axuda tanto ao Sergas como á Xunta de Galicia para costealo, mais a resposta das entidades públicas polo momento foi negativa.

Atópome soa e teño que volver saír e dar un paso adiante

"Atópome soa e teño que volver saír e dar un paso adiante. Quero pedir a solidariedade da xente e por iso estamos hoxe aquí, porque preciso outra vez toda a axuda posible", afirmou a tamén presidenta da asociación GaliciAME, que de novo pon a disposición da xente unha hucha solidaria co fin de recadar os cartos que precisa para realizar a viaxe e o tratamento en Corea.

"Ante a nefasta resolución ou incapacidade de poder solucionar a miña situación véxome na obriga de activar o número de conta e volver a pornos en marcha para recadar, polo menos, eses 80.000 euros para poder asegurarme un ano máis do tratamento e definir así un pouco máis o meu futuro e o da miña familia". Uns seres queridos que asegurou "tamén sofren a doenza". 

Na comparecencia pública desta mañá no salón de plenos do Concello de Cambados, que contou coa presenza do alcalde, Samuel Lago, e da concelleira de Igualdade, Fátima Abal, púxose en marcha o crowdfunding co fin de costear o tratamento de Merchi. Dende a empresa Trafos volven a colaborar poñendo 100 huchas a disposición dos comercios que o desexen solicitar no que a afectada espera que sexa "unha onda de solidariedade".

Volvemos a precisar xuntar cartos, porque senón estou perdida

"Volvemos a precistar xuntar cartos, porque senón estou perdida. Quero seguir a liña do que que comezou fai un ano e que supuxo un claro cambio para ben na miña calidade de vida" asegurou Merchi, que comentou que cando lle suministran o tratamento, recibe "unha onda de enerxía". "Levo un par de semanas que entre o disgusto e o estrés voume quedando sen pila".

Comeza agora a campaña de recadación de fondos para o tratamento, segúndo Merchi, porque "veñen as vacacións e a miña situación segue sen resolverse, e canto antes os xunte antes me vou". O certo é que neste tempo, dende o mes de novembro no que recibiu o primeiro procedemento, tanto ela como o seu círculo non pararon de facer accións e petar en todas as portas posibles. "Xustamente hoxe están aquí Fátima e Samuel que me axudaron a acudir a unha porta que finalmente estaba pechada". Solicitou encontros co anterior presidente da Xunta, Alberto Núñez Feijóo, e co actual, Alfonso Rueda, pero a resposta segue sendo negativa e conta con trabas para costear o tratamento por parte das entidades públicas. 

Neste eido, o alcalde mostrou o seu "apoio público, non so dende o punto de vista económico ou loxístico por parte do Concello, contando con ela para todos os eventos que facemos e que se poida recadar algo, pero sobre todo queremos apoiala anímicamente, xa que ela o último que quería era pedir axuda económica". 

Co fin de resolver a situación e poder viaxar cara ao país asiático canto antes, abríuse un número de conta a disposición de todas as persoas que desexen aportar un grao de area para axudar a Merchi co seu tratamento, que é o seguinte: ES 7821005036450200307703.