En xaneiro fixo un ano desde que é concelleiro. Como foi a aprendizaxe?
Levo participando na vida do BNG desde o ano 1995 e teño ido nas listas. Estou fogueado.
Despois do baixón de 2019, con que ánimos se presentan?
Desde unha óptica realista e pensando no traballo feito nestes catro anos por abaixo, falando coa xente que buscou outras opcións, e tamén na receptividade que estamos tendo na campaña. Queremos medrar e ser a forza que lidere un goberno de esquerdas.
Pode axudar o vento que parece soprar a favor do BNG?
Todos os inquéritos din que somos a forza que vai cara arriba. A marca suma e nós somos unha organización cun proxecto para Galiza.
Que balance fai do mandato anterior?
O orzamento non se corresponde coas necesidades de Cambados, é un suma e sigue dos da época do PP. O Concello está sen recursos humáns e a Relación de Postos de Traballo está baleira de contido. Hai que facer á xente protagonista. As fotos que sexan para os clubs e as asociacións veciñais eculturais, e que sexan os dinamizadores da vida social. A diferencial do IPC co que subiron os presupostos é de oito puntos, iso significa 380.000 euros que deixa de ter para investir.
Que plantexa o BNG?
As Normas Subsidiarias son do ano 1990 e o urbanismo está estancado, non temos vivenda nin solo para construíla. Queremos reformar a fronte litoral. É un proxecto de máis de 20 millóns de euros no que vai un aparcadoiro soterrado e 3.000 metros de zonas verdes. É un traballo moi ambicioso. Tamén queremos a integración das parroquias no Concello, sen diferenciacións.
