Cambados acolle un ano máis distintas actividades "para todos os tipos de públicos" na LXXI edición da Festa do Albariño, que contará con máis de 50 eventos dende o vindeiro día 2 de agosto, e á que se sumarán as actuacións de Belén Aguilera e Stay Homas como atractivos dun cartel no que xa se anunciara previamente a presenza de Justin Quiles, Zahara e Lontreira. O alcalde, Samuel Lago Ozón, presentou este mércores a famosa festa á que se desprazarán decenas de miles de persoas de toda Galicia e de España, "e incluso estranxeiros". "Este ano volvemos ao formato tradicional na duración máis tradicional, dende o mércores día 2 ata o domingo día 6 de agosto", despois de que o ano pasado se conmemorara a LXX edición, recalcou o alcalde.
Nesta ocasión será a compañía de teatro Caracol a encargada de ler o pregón o vindeiro día 2 na Praza do Concello (13.00 horas), para celebrar os seus 30 anos de actividade.
O Paseo da Calzada contará con 41 casetas de viño nas que se poderán degustar os produtos da Denominación de Orixe Rías Baixas. Estas estarán abertas dende o mércores ata o domingo ao mediodía e pecharanse ás 3.00 horas. Repartiranse un total de 35.000 cataviños e, en canto ás foodtrucks, que serán outro dos atractivos da festa, atoparanse na parte exterior deste paseo. Se ben o ano pasado había oito, este ano ampliarase a oferta ata 12 propostas. No Salón Peña funcionará o Túnel do Viño que, lembrou Lago, é un evento "para un público máis especialista e técnico". Neste caso, haberá 54 bodegas e 101 mostras. A cata comezará o xoves ás 11.30 ata as 15.30 horas, con dous turnos de dúas horas, e pola tarde de 17.30 ata as 21.30 horas. O sábado só estará dispoñible pola mañá.
Pola súa banda, o secretario do Consello Regulador, Ramón Huidobro, destacou a participación de 55 bodegas na tradicional Cata, que comezará o xoves, día 3, a partir das 10.00 horas no Parador de Cambados. O venres 4 terá lugar a Cata Derradeira, onde se escollerán os tres primeiros clasificados, para o que se contará cun grupo de 12 catadores "de todos os perfís do mundo da etnoloxía, xornalistas ou catadores de Estrelas Michelín". O sorteo para elixir as bodegas que estarán nos stands será o vindeiro día 27 de xullo en ExpoSalnés.
CONCERTOS E EVENTOS. Dende o Concello de Cambados explicaron que todos os eventos son de balde excepto as actuacións xa anunciadas de Justin Quiles (3 de agosto) e de Zahara xunto con Lontreira (4 de agosto), que terán un custe de 10 e 7 euros respectivamente (sen comisión engadida). A estas súmanse agora as actuacións de balde de Stay Homas (5 de agosto) e Belén Aguilera (2 de agosto) e a inauguración da Festa a cargo de Luar da Lubre (1 de agosto). Tamén haberá verbenas e diferentes actuacións todos os días, como a da orquestra Los Satélites o mércores 3 na Praza do Concello ou diferentes DJs durante as xornadas do venres e do sábado, coa Nortada Electrónica e outras localizacións, a partir das 23.00 horas.
Se ben o programa da festa inaugurarase o mércores nos stands, "o día do Pé de Cuba, que é o día anterior do inicio da festa, haberá un evento de carácter infantil e un concerto de inauguración de Luar da Lubre", explicou o tenente de alcalde, Tino Cordal.
As actividades lúdicas repartiranse por toda a vila. "Haberá actividades dende a xente máis moza para todos os gustos musicais e para a xente máis maior, con verbenas por distintos puntos da vila", lembrou Cordal. "Desexamos que todo saia segundo o formulamos e que discorra todo coa maior tranquiliade posible. Imos reforzar a seguridade cun incremento dos turnos e con membros da Policía Local doutras localidades", comentou o alcalde, quen tamén sinalou que se levará a cabo un reforzo dos distintos dispositivos de emerxencias e do servizo de limpeza das rúas.
CORTES DE TRÁFICO. O tráfico cortarase o mércores na Avenida de Vilariño e no semáforo da Avenido do Salnés. Este corte durará ata o domingo día 6 que porá fin á festa. Ademais, cabe destacar que haberá oito módulos de aseos nas casetas do Paseo da Calzada, mentres que no resto dos lugares da festa instalaranse 50 baños químicos.